. .

 

 

_Kinderwelt
. .
.
  RUMMELPOTT   BRAUCHTUM
Zurück Thema
4.57
 
 

För all uns Singn harrn wi ton Schluß ganz veel Appeln, Nöt un Koken kregen un veerunsößtig Penning. För jeden also 32 Penning. Dor kunn wi domals 3 Liter Frischmelk för köpen, un dor bleben noch 2 öwer.
Wat'n Geld'! Wat'n Geld to domaligeTiet!

Nu mal een groten Sprung na 1970. Wi wärn all in Arbeit un verdeen nich schlech. Mien Fru un ick wärn Ooldjohrsabend bie uns Frönde in Westermarlsdörp (Westermarkelsdorf), bie Hans un Elli. Bi Hans un Elli war noch mehr Beseuk, un do kregen wi de Infall: Tosam Rummelpott rüm!
Günther speel Mundharmonika, ick harr mien Waldzither, un Hans, de hal sien Düwelsgeige, de he sick vor veele Johrn mal sülm bout harr, ut de Böhneck.
Beten hebbt wi tosam öwt, ton Bispiel: „Lustig ist das Zigeunerleben", „Wir sind die Friesenkinder" un „Im grünen Wald, dort, wo die Drossel singt."
In de Tiet, de wi euben dähn, härn de Frunslüd Maskeradenklamotten tosamsöcht, un nullkommanix warn wi startbereit.
Wi dree Mannslüd möken Musik, un Marga un Gretchen hebbt sungn, dat de Heide wackeln dä. Ganz Westermarlsdörp hebbt wi affklappert, un denn mit'n Auto hen na Schlogsdörp (Schlagsdorf), un dor uck ganz Dörp rüm.

Op de meisten Steeden schulln wi een Schnaps mit ehr drinken, wenn wi speelt un sungn harrn. Wi hebbt dankend afflehnt. Wülk (Viele) Lud hebbt de bekannten Leeder mitsungn, un welk (einige) füngn an to danzen. Wie veele vergneugte Gesichter hebbt wi sehn, wie veele Freude hebbt wi bereitet, un wie veel Spaß un Freude hebbt wi sülm hatt.
As wi ton Schluß bi Hans un Elli uns Geld teilt hebbt, do kämen wi ut'n Staunen gornich herut - un Ji staunt seker uck.- Wi harrn - sage un schreibe - eenhunderttwölf Mark in uns Geldknipp.
Wat ? So veel ?
Dorbi güngn uns dat gornich um Geld.
Nä, nä! Wi harrn uns Spaß hatt, un - wi warn nochmal Rummelpott rüm weest!
Prosit Neejohr!
wünscht jo August Scheel.

 
Urheberrechtlich geschützt. Jede Form der gewerblichen Nutzung und Vervielfältigung ist untersagt.
© KALEIDOSKOPAJANIS 2006©